Chotu, Ek Sangeen Apraadhi
Ek sangeen jurm, bohot bada daaka dala hai,
Aaj Chotu roti leke bhaga hai.
Thane mein mach gaya hungama bada,
“Ek roti ka chor, desh ko barbaad karme chala!”
Sipahi chale, hathiyaar uthaye,
Jaise desh ke dushman ko todne jaaye.
Media bhi aayi, camera leke
“Yeh roti ka chor hai, kanoon ke theke!”
Headline bani, discussion shuru hua,
Ek roti ka chor ab rashtra ka dushman bana.
Netaji bole, “Yeh vidroh ki neev hai,
Agar roka na gaya, toh hani honi anek hai.”
Mantri chintit, sab munh pe haath dhare,
Chotu ke jurm par sabhi vichar kare.
Chotu soch raha tha, “Yeh maine kya kiya?
Ek roti churai, toh kanoon hi pighla diya?”
Bhookh thi zimmedar, jurm thi majboori,
Magar kanoon ke liye ban gaya sangeen apraadhi!
Jab logon ne pakda, maara khoob,
Na dekhi masoomi, na samjha majboor.
Roti ke tukde khoon se rang gaye,
Chotu ke armaan mitti mein dhaye gaye.
Tabhi waha daroga aaye,
moocho p taao, chaati chaudaaaye
media ki taraf dekh k bole,
ab sangeen apradhi giraft mai hai
aur desh ek dam swasth hai.
Jahan balatkaari ghoomta aazad hai,
Jahan khuni aaj bhi aabad hai,
Jahan poori Sarkar hi bhrasht hai
Kya waha mera hi jurm apwaad hai?
Chotu ki aakhen sawal krti,
Aur aasuon se apni jawab dhoodti,
yeh duniya kyun bhookh se anjaan hai,
Jahaan roti churana maha paap ke saman hai.
Jo Chotu ke saath hua, ek sawal chhod gaya,
“Kya ek roti ka daam, Ek insaan hai?”
– Sumant Singh
